ಹ್ಯಾಂಗ್ ಬರಿಲಿ ಕವಿತೆ

ಮನದಾಗ ಬರಿ ಕತ್ತಲೆ ತುಂಬೈತೆ
ಭಾವನೆ ಸತ್ತು ಮಣ್ಣು ಸೇರೈತೆ
ಒಲವ ಹಾದಿಗೆ ಬೇಲಿ ಬಿದೈತೆ
ಮಾತೆಲ್ಲ ಮೌನದ ದಾಳಕ್ಕೆ ಸಿಕೈತೆ
ಹ್ಯಾಂಗ್ ಬರಿಲಿ ನಾ ಕವಿತೆ

ಇರುಳ ಕನಸ್ಸಿಗೆ ಹಗಲು ನಕೈತೆ
ಸಂಜೆಯ ಸೂರ್ಯ ಕಣ್ಣ ಕುಕೈತೆ
ಮುಂಜಾನೆ ಚಂದ್ರ ಇರುಳ ಬೇಡೈತೆ
ಆಗಸಕ್ಕೆ ಬಿಳಿ ಮೋಡವೆ ಭಾರವಾಗೈತೆ
ಹ್ಯಾಂಗ್ ಬರಿಲಿ ನಾ ಕವಿತೆ

ಅಂತರಾಳದ ಆಳಕ್ಕೆ ಕಾಲು ಜಾರೈತೆ
ಬದುಕಿನ ಓಟಕ್ಕೆ ಪೆಟ್ಟು ಬಿದೈತೆ
ಮನದ ನೋವಿಗೆ ಕಂಬನಿ ಉಕೈತೆ
ಕನಸ ಗೋಪುರಕ್ಕೆ ಸಿಡಿಲು ಬಡಿದೈತೆ
ಹ್ಯಾಂಗ್ ಬರಿಲಿ ನಾ ಕವಿತೆ

-

ಕಿವಿಗೆ ಬಿದ್ದ ಮಾತಿನ ಅರ್ಥವನ್ನೆಗೆ ಹುಡುಕಲಿ
ಮನದೊಳಗೆ ಹುಟ್ಟಿದ ಮೌನವನ್ನೇ
ಅರಿಯದೆ ಕುಳಿತಿರುವಾಗ
ನಾನು

-

ದಿನವೂ ಹುಟ್ಟುವ ಈ ಇರುಳನ್ನೇಕೆ ಶಪಿಸಲಿ
ಗಾಡನಿದ್ರೆಯಲ್ಲಿ ಹುಟ್ಟಿ ಸಾಯುವ
ಕನಸುಗಳ
ಅಂತ್ಯಕ್ರಿಯೆದ್ದೆ ಚಿಂತೆ
ನನಗೆ

-

ಮತ್ತದೇ ಭಾವಗಳಿಂದ ಜೀವ
ಬೆದರಿಕೆ ಇದೆ, ಈಗೀಗ
ಬದುಕಿಸಿಕೊಳ್ಳುವ ಪ್ರಯತ್ನವೂ ನೆಡೆಯುತ್ತಿಲ್ಲ
ನನ್ನಿಂದ

-

ಮೌನಗಳೆಲ್ಲವು
ಸಮ್ಮತಿಯನ್ನಷ್ಟೇ ಅಲ್ಲ
ತೀವ್ರ ನಿರಾಕರಣೆಯನ್ನು ಸಹ
ಸೂಚಿಸಬಹುದು

-

ನಿಶ್ಯಬ್ದ...
ಅಸಹನೀಯ ಮೌನ...
ಬಹುಷಃ...
ಭಾವಗಳೆಲ್ಲವು...
ಮಸಣದ ಹಾದಿ ಹಿಡಿದಿರಬೇಕೇನೋ

-

ಬದುಕೆಂದ್ರೆ ಮತ್ತೇನಲ್ಲ
ಭಯ ಮತ್ತು ಜವಾಬ್ದಾರಿ
ಅಷ್ಟೇ..

-

ಸೋತೆನೆಂದು
ಜಗದ ಮಾತಿಗೆ ದುಃಖಿಸುತ್ತಾ ಕುಂತರೆ
ಹೆತ್ತವರ ಜವಾಬ್ದಾರಿ
ಪೆಟ್ಟಿಗೆ
ಹೊರುವವರಾರಯ್ಯ..?

-

ಮಾಸದ ಗಾಯಗಳ ಲೆಕ್ಕಾಚಾರದ ಉತ್ತರಕ್ಕೆ
ಕಾಯೋದು ಬಿಟ್ಟಿದ್ದೀನಿ
ಸುಮ್ಮನೆ ಖುಷಿ ಕೊಡುವ ಯಾರದ್ದೋ ಕಳವಳಕ್ಕೆ
ಕಾಯೋದು ಬಿಟ್ಟಿದ್ದೀನಿ
ಹೀಗೆ ಸಿಕ್ಕು ಹಾಗೆ ಜಾರಿಕೊಂಡವರ ಭೇಟಿಯ ಅರ್ಥಗಳಿಗೆ
ಕಾಯೋದು ಬಿಟ್ಟಿದ್ದೀನಿ
ಒಂದಿಷ್ಟು ನೆನಪುಗಳನ್ನಡವಿಟ್ಟು ನಾಪತ್ತೆಯಾದ ನೆಮ್ಮದಿಗಾಗಿ
ಕಾಯೋದು ಬಿಟ್ಟಿದ್ದೀನಿ
ಮನಸ್ಸಿನ ಮೂಲೆಯಲ್ಲಿ ಬಾಡಿಗೆಗಿದ್ದು ಸಿಂಗರಿಸಿ ಹೊರಟ ಭಾವನಗಳಿಗೆ
ಕಾಯೋದು ಬಿಟ್ಟಿದ್ದೀನಿ

-

ಇನ್ಯಾರನ್ನೋ ದ್ವೇಷಿಸುವುದರಲ್ಲೇನಿದೆ
ನಾನೇ ಎಡವಿ ಬಿದ್ದಿರುವಾಗ
ಬದುಕಲ್ಲಿ

-