വീണ്ടും കുഞ്ഞിക്കാറ്റുകളും ചെറുകിളികളും വന്നു പോയി, ശംഖുകൾ പിന്നെയും തീരത്തെ തേടി വന്നു, കാലം തെറ്റുമ്പോൾ കരകവിയുകയും വരണ്ടുപോകുകയും ചെയ്തു, എന്നിട്ടും പൂഴിമണലിൽ അമർത്തിപ്പതിഞ്ഞ, ഒരിക്കലും തിരിച്ചുവരാത്ത, ആ നാലു പാദങ്ങളെയും കാത്ത്, കര കണ്ണീർ വാർത്തു കൊണ്ടേയിരുന്നു

-

ആ വേരുകളിലിരുന്ന് സ്വപ്‌നങ്ങൾ കാണണം, മുല്ലവള്ളികൾ പൊഴിച്ച പൂക്കളെ പെറുക്കിയെടുത്ത് വേലിക്കപ്പുറത്തേക്ക് നോക്കണം, അവിടെ നിന്ന് നീയെറിയുന്ന നോട്ടങ്ങൾ കൊണ്ടെങ്കിലും വാടാതിരിക്കട്ടെ മുല്ലപ്പൂമണമുള്ള, മിഴിനിറയ്ക്കും ഓർമ്മകൾ.

-

മനസ്സിനെയും മനസാക്ഷിയെയും വേർതിരിക്കുന്ന ഇടനാഴിയിലൂടെ ഭ്രാന്തമായി അലഞ്ഞിട്ടും കണ്ടെത്താനാവാത്ത ചില ശരിതെറ്റുകളുണ്ട്

-

കാലത്തിന്റെ തികട്ടലുകളിൽ,
തിരിഞ്ഞു നോട്ടത്തിന്റെ കവിതകളിൽ,
വരണ്ട കാടുകൾ ഇല്ലാത്തവർ ഉണ്ടാകില്ല

-

തിരകളുടെ തലോടലുകളില്ലാതെ ജീവിച്ചു മരിച്ച കടലും ഉണ്ടിവിടെ

-

ഇന്നലെ വിരിഞ്ഞ ശൂന്യതയുടെ നിറമുള്ള പൂവിൽ കറുപ്പും വെളുപ്പും പകരാതിരിയ്ക്കൂ, വസന്തത്തിലേയ്ക്കുള്ള വഴികൾ കാട്ടൂ, അത് തനിയെ നിറങ്ങളിൽ നീരാടട്ടെ

-

ആ പഴയകാലത്തിലേയ്ക്ക് ഒരിക്കൽ കൂടി പോകണം. ഓണത്തിന് മുത്തശ്ശിയുടെ വീട്ടിലെ ഊഞ്ഞാലിൽ മാനം മുട്ടെ ആടി, പേടിച്ച് നിലവിളിക്കണം. മാണിക്കച്ചെമ്പഴുക്ക കളിച്ച് പിണങ്ങി മുഖം വീർപ്പിച്ചിരിക്കണം. 'പിൻ'ഇട്ടു കളിയിൽ ചൂടും തണുപ്പും പറഞ്ഞ് കൂട്ടുകാരെ വട്ടം ചുറ്റിക്കണം. പള്ളിക്കൂടത്തിലെ കള്ളനും പോലീസും കളിയിൽ ഓടിവീണ് മുട്ട് പൊട്ടിയതിന് 'കണക്കി'ന് കേൾക്കണം. ചേച്ചിയോട് വഴക്കിട്ട് പിടിവാശി കാണിച്ച് അമ്മയോട് കൊഞ്ചണം. ക്ലാസ്സ്‌ പരീക്ഷയ്ക്ക് രണ്ട് മാർക്ക് കുറഞ്ഞു പോയതിന് നിന്നനിൽപ്പിൽ പൊട്ടിക്കരയണം. പിന്നെയും മുന്നോട്ട് നടന്ന്, ഇന്റേണൽ പരീക്ഷയ്ക്ക് കഷ്ടിച്ച് പാസ്സായതോർത്ത് ആശ്വസിച്ച് കലാലയ പടവുകൾ ഇറങ്ങി നടക്കണം. അപ്പോഴും ആ പടവുകളിലെവിടെയോ ഉപേക്ഷിച്ച് മടങ്ങിയ നഷ്ടങ്ങളെയോർത്ത് നെടുവീർപ്പിടണം.

-

സങ്കടക്കടലാഴങ്ങളിലെ ഒറ്റവേരായി സന്തോഷമങ്ങനെ പടർന്നു കയറിയാലും, ആനന്ദതീരത്തടുക്കുവാൻ പിന്നെയും കാത്തിരിക്കേണ്ടിവരും

-

തന്റെ മടക്കയാത്രയ്ക്കു തൊട്ടു മുൻപ് മുളച്ചു വന്ന തകരതൈകളുടെ വേരുകൾക്കായ് മാത്രം ഒരു തുള്ളി കണ്ണുനീർ മാറ്റി വച്ച് മഴക്കാലം ഓടി മറഞ്ഞു

-

വല്ലപ്പോഴുമൊന്ന് നമ്മിലേയ്ക്ക് തന്നെ പുറപ്പെട്ടു പോയി,
ചില വഴികളെങ്കിലും പൂർത്തിയാക്കി മടങ്ങണം

-