ನಿನ್ನದೇ ಪ್ರತಿಬಿಂಬ ನನ್ನ ಮನದೊಳಗೆ
ಜೊತೆಯಾಗಿದೆ ನಿನ್ನ ನೆನಪು ಪ್ರತಿ ಘಳಿಗೆ
ಇರುಳಲಿ ಬೆಳಕಾಗಿ ಪ್ರಕಾಶಿಸುವ ಕಿರುನಗೆ
ಎಡೆಬಿಡದೆ ಮೋಹಿಸಿದೆ ಕಣ್ ಕಣ್ಣ ಸಲಿಗೆ

ನಿನ್ನ ಉಸಿರಾಟವೇ ನನಗೆ ತಂಪಾದ ಗಾಳಿ
ಆಡುವ ಮಾತುಗಳೇ ವಿಶೇಷ ಚಿನಕುರಳಿ
ಮರುಭೂಮೀಲಿ ಸಿಕ್ಕ ನೀರಂತ ಜೀವಜಲ
ನಿಶ್ಚೇತವಾದ ಮನಕೆ ಚೈತನ್ಯದಂತೆ ನೀ ಬಲ

ಅನುದಿನವೂ ಅನನ್ಯವಾದ ನಿನ್ನ ಸ್ಮರಣೆ
ನೆನೆದಾಗ ಮಾಯವಾಗುವುದೆಲ್ಲಾ ಬವಣೆ
ಅನಂತವಾದ ಅನೂಹ್ಯ ಅನುರಾಗ ಅಮರ
ಬರಗೆಟ್ಟ ಬದುಕ ಭರಣವಾಗುವುದೇ ಬಂಗಾರ ???

-

ರಾತ್ರಿಯ ಪರಿಸರ ಶಾಂತ
ದುಡಿದ ದೇಹವು ಶ್ರಾಂತ
ತನು ಮನ ವಿಶ್ರಾಂತಿ ನಿರತ
ನಿದ್ರಾದೇವಿಯೀಗ ಆಗಮಿತ

-

ದೂರದಲಿ ನಿಂತಿದೆ ನೆನಪೊಂದು ಮಸುಕಾಗಿ
ಹೃದಯದಿ ಕಾಡುತಿದೆ ದುಗುಡ ಮಾರ್ಧನಿಯಾಗಿ
ಕಳೆದುಹೋದ ದಿನಗಳ ಕಹಿ ಸಿಹಿ ನೆನಪಾಗಿ
ಬದುಕಿನಲ್ಲಿಂದು ಚುಚ್ಚುತಿವೆ ಗತ ಕ್ಷಣ ಮುಳ್ಳಾಗಿ

ಹೋಗಿ ಬಾರದ ಹಾದಿಯಲಿ ಕಾದಿರುವೆ ಒಬ್ಬಂಟಿ
ಭಾರವಾದ ಮನ ಕೇಳುತಿದೆ ಆಗಬಹುದೇ ಜಂಟಿ
ಕಣ್ಣಂಚಿನ ಕಂಬನಿ ಉಕ್ಕುತಿದೆ ನೋವ ತೆರೆಯಾಗಿ
ವಿರಹದಿಂದ ಸೊರಗುತಿದೆ ನಿತ್ಯ ತನುವು ಕೊರಗಿ

ಕಾಲವುರುಳಿದರೂ ಮಾಸದ ನೋವಿನ ಸೇಳೆತ
ಬೆಂಕಿಯಂತ ದುಗುಡದಿಂದ ಮುದುಡುವ ಚಿತ್ತ
ಬಾರದೆಯೆ ಮುಗಿಯುವುದೇ ಬದುಕಿನ ಪಯಣ
ಒಂಟಿಯಾಗಿರುವ ನತದೃಷ್ಟ ಜೀವಿಯೀಗ ನಿತ್ರಾಣ .

-

ಹುಟ್ಟಿದ ಮೇಲೆ ಬದುಕುವುದು ಅನಿವಾರ್ಯ

-

ಹುಟ್ಟುವ ನಿರ್ಧಾರ ನಮ್ಮದಲ್ಲ
ಮುಟ್ಟುವ ನಿರ್ಧಾರ ನಮ್ಮದೇ
ಒಳ್ಳೆಯ ಗುರಿಮುಟ್ಟುವತ್ತ ಇರಲಿ ಚಿತ್ತ

-

ಮುಳ್ಳಿನ ಗಿಡದಲ್ಲಿ ಸುಂದರ ಹೂವು ಅರಳುವಂತೆ
ಮನದಲ್ಲಿ ಎಷ್ಟೇ ನೋವಿದ್ದರೂ ಮುಖದಲ್ಲಿ ಮಂದಹಾಸ ಮೂಡಲಿ.

-

ಮನದ ತೋಟದ ಹೂವ ಮಕರಂದ ಹೀರುವ ಕಾತುರ
ತನ್ನತ್ತ ಕರೆವ ಪುಷ್ಪವ ಕಂಡು ಪುಳಕಿತಗೊಂಡ ಭ್ರಮರ

-

ಈ ಮಧ್ಯಾಹ್ನದ ತಾಪದಲ್ಲಿ
ನಿನ್ನ ನಗುವೆಂಬ
ತಂಗಾಳಿಯದ್ದೇ ತಂಪು...🥰❣️

-

ಮುತ್ತಿನ ನಗುವಿಗೆ ಅರಳಿದ ಮನಸು
ನಿನ್ನ ನೋಟಕೆ ಸೋತಿಹುದು ಕನಸು
ಮಧುರ ಅದರದಲ್ಲಿನ ವಚನದಿಂಪು
ಲತೆಯಂತೆ ಬಳುಕುವ ನಡಿಗೆ ಸೊಂಪು

ಕಂಗಳ ಕಾಂತಿಯಲಿ ಸೆರೆಸಿಕ್ಕ ನಾನು
ಹುರುಪಿನ ಹೂರಣ ಹೊಕ್ಕಿದ ತನು
ಒಲವಿನ ಅನುಭವ ರೋಮಾಂಚನ
ಹೃದಯದ ಗೂಡಿನಲಿ ಪ್ರೇಮ ಗಾನ

ನಿತ್ಯವೂ ಕಾಡುತಿದೆ ಮೊಗದ ಕಾಂತಿ
ನೀ ಎನ್ನ ಬಾಳನು ಬೆಳಗುವ ಜ್ಯೋತಿ
ಜೀವನಕೆ ಸಿಗುವುದು ಶಾಶ್ವತ ಶಾಂತಿ
ಏಳೇಳು ಜನ್ಮಕೆ ನೀನಾದರೇ ಸಂಗಾತಿ

-

ಆಂತರ್ಯದ ಜಪ

ಕಂಗಳಲಿ ಹೊಳೆವ ತಾರೆಗಳ ಕಾಂತಿ
ನಗೆಯಲಿ ಅರಳುವ ಮಲ್ಲಿಗೆಯ ಶಾಂತಿ
ತುಟಿಗಳಲಿ ನರ್ತಿಸುವ ಮಂದಹಾಸ
ಮನಸೆಲ್ಲ ತುಂಬಿದ ಪ್ರೀತಿಯ ವಿಶ್ವಾಸ ||

ಕೇಶದಲಿ ಕಪ್ಪನೆಯ ಮೋಡಗಳ ಆಟ
ನೋಟದಲ್ಲಿ ಮಿಂಚಿನ ಸಂಚಲನ ನೋಟ
ನಡೆಯಲಿ ನವಿರಾದ ಲತೆಯ ಲಯ
ಸಮೀಪಸಲಿ ಸಂಭಾಷಣೆಯ ಪ್ರಮೇಯ ||

ಚೆಲುವಿನ ಚಿಲುಮೆ ನೀನು ಅನಂತ
ನಿನ್ನಂದಕೆ ಮನ ಸೋತಿದೆ ಶಾಶ್ವತ
ಹೋಲಿಕೆಗೆ ಸಿಗದ ನಿನ್ನಯ ಸೌಂದರ್ಯ
ಜಪಿಸುತಿದೆ ಅನುದಿನವೂ ನನ್ನ ಆಂತರ್ಯ ||

-