કોઈ તનથી, કોઈ મનથી, કોઈ ધનથી, બધા લૂંટનારા જ મળ્યા!
પોતાના હકનું ચૂસી નિરસ કરી ઘા કરે એવા ફૂંકનારા જ મળ્યા!

વાત, જાત શું-શું ને ક્યાં ક્યાં ભટકું, અહીં ઠેક-ઠેકાણે સરખુ છે,
શક્તિ-સમય-સગપણ-વાન-શાન ને ભાન ચૂંથનારા જ મળ્યા!

હવે આપણે જ સુધરી જવું પડશે, આખું ગામ શરમ વગરનું છે,
કાપી કાપીને તમે શું કાપી લેશો, ચારેકોર નાક વગરના જ મળ્યાં!

લાભ લઈને શુભ કરી પોતાના ઠેકાણે પોતાનું બધું સાચવી લીધું,
ઊભું રહી જ્યારે ટેકો કરવાનો આવતા છટકનારા જ મળ્યા!

- અલ્પેશ કારેણા.

-

અરે ઓ જાગો-જાગો બકરે, તલાટી આવી ગઈ,
ચોપડા લઈને ભાગો બકરે, તલાટી આવી ગઈ.

તમારી ભરતી ખાઈ ગયા નેતા,
ને તોય તમારે બનવું અભિનેતા,
હવે તો અક્ષર સાથે નાચો બકરે, તલાટી આવી ગઈ,
અરે ઓ જાગો-જાગો બકરે, તલાટી આવી ગઈ.

દિકરો ને પિતા સાથે આપે પરિક્ષા,
દીકરી તો કૈંક વર્ષોથી કાપે પરિક્ષા,
આખું ઘર વાચો-વાચો બકરે, તલાટી આવી ગઈ,
અરે ઓ જાગો-જાગો બકરે, તલાટી આવી ગઈ.

અરે ઓ જાગો-જાગો બકરે, તલાટી આવી ગઈ,
ચોપડા લઈને ભાગો બકરે, તલાટી આવી ગઈ.

- અલ્પેશ કારેણા.

— % &

-

અંગ્રેજની આખી જાતને હંફાવનારો એક આઝાદ થઈ ગયો,
ભારત માનો સાચો લાલ એક ચંદ્ર શેખર આઝાદ થઈ ગયો.

સીતારામની ચેતનાનો અંગાર અને જગરાણીના ખોળાનો ખૂંદનાર,
મધ્ય પ્રદેશનો નાનો ભૂલકો હિન્દુસ્તાનનો સરતાઝ થઈ ગયો.

એક પત્થર મારી ચૌદની ઉંમરે ફોડી નાખ્યું'તું અંગ્રેજનું માથું,
તે ત્રણ આના ઠુકરાવ્યાં ને ભૂરિયાઓનો પાવર બરબાદ થઈ ગયો.

તારું સપનું પણ એક ને હકીકત પણ એક! ભારતની આઝાદી
દેશના સુવર્ણ ઇતિહાસના પન્નાનો તું અરજદાર થઈ ગયો.

વટથી જીવનાર તો ઘણા જોયા, તું તો મર્યો પણ ખરા વટથી,
શબ્દ શું વાપરું, તું તો આખી ડીક્શનરીનો હકદાર થઈ ગયો.

લખવો તને કેટલો આ કલમ પણ હવે ખુમારીનાં ઓડકાર મારે છે.
ભલે થોડું જીવ્યો તો'ય સદીઓ સુધી જીવનાર થઈ ગયો.

-અલ્પેશ કારેણા.

-

તારા પ્રશ્ન વચ્ચે ક્યાંક સમાધાન હશે, જોવાય તો ખરી ને યાર!
જો દેખાઈ નહીં તો વધુ એકવાર આંખ ધોવાય તો ખરી ને યાર!

તું એક નહીં, ઉભરતા લાખોની ઉમ્મીદ તૂટી,
પૈસાની કમી નહીં ને ટેલેન્ટ પણ હતું કૂટી-કૂટી,
બહેનો, પપ્પા, દિવંગત મમ્મી, કોઈનું તો વિચાર,
ભયલા તારે ખાતર કેટ કેટલી લાગણી વછૂટી,

બન્ને હાથની લકીરનાં એકાદ ખૂણે ફંફોળાય તો ખરી ને યાર!
જો દેખાઈ નહીં તો વધુ એકવાર આંખ ધોવાય તો ખરી ને યાર!

તારા જવા પાછળ પણ કેટલી શંકા-કુશંકા,
આત્મહત્યા કે પછી મર્ડર એમાં પણ આશંકા,
તને જોઇને કોઈને નહોતું લાગતું આવું કરીશ,
તારી સ્માઇલ સામે શું કરી લેવાના ફાંસીના ફંદા,

સીધી હાર થોડી મનાય, હજુ થોડું વધારે લડાય તો ખરી ને યાર!
જો દેખાઈ નહીં તો વધુ એકવાર આંખ ધોવાય તો ખરી ને યાર!

- અલ્પેશ કારેણા.

-

જો તો ખરી, માણસને કેવો ઢઢો છે વગર મોતે મરવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો,

ખાવું, પીવું, જાવું અને સુવા સિવાય કંઈ કામ નથી,
ટેણિયાંથી લઈ ડોસા સુધી કોરોના સિવાય નામ નથી,
મોકો મળ્યો રાત-દિવસ સોશિયલ મિડીયામાં ઘૂસવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો,

છે ચારેકોર લોકડાઉન, છતાંય ન આવ્યું કોઈને ભાન,
પછી ખાખીવાળાના ડંડા ખાઈને વધારે પોતાની શાન!
જોને કેવો નશો ચડ્યો છે માણસને માણસ સહેવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો,

કરો નહીં ન કરવાના કામ ને બીજાનું જીવવું હરામ,
તમારા વાંકે લાગશે નિર્દોષ જનતાના પછવાડે ડામ,
હવે તો સમજો વ્હાલા નહિતર આવશે વારો રડવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો,

નહીં માનો તો તમે'ય મરશો ને પરિવારને'ય મારશો,
બાપલીયા ધીરજ ધરો, આમનેઆમ કેટલાને તારશો,
ઢીલા પડો મારા બાપ, સમય છે ઘરની અંદર બેસવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો.

જો તો ખરી, માણસને કેવો ઢઢો છે વગર મોતે મરવાનો,
બિચારાને કેવો કંટાળો આવે ઘરમાં બૈરાં ભેગો રહેવાનો.

-અલ્પેશ કારેણા & રિના વરિયા

-

સફાઈ અને મીડિયા કર્મી તમારો ખૂબ આભાર,
ડોક્ટરો-નર્સો તમારી પાસે કોરોના પણ લાચાર.

જાન લગાવી દાવ પર તમે ધ્યાન રાખ્યું અમારું,
એવી મન્નત હું'ય માગુ ઈશુ કલ્યાણ કરે તમારું,
તમે જ ભગવાન, અલ્લાહ અને તમે જ દાતાર,
ડોક્ટરો-નર્સો તમારી પાસે કોરોના પણ લાચાર.

પળે પળની ખબર પોંહચાડી તમે ચોમેર દોડીને,
માસ્ક લગાવ્યા વગર માઇક સાથે કેમેરા ખોડીને,
શબ્દો તમારા, ખબર તમારી, માહિતીનો આધાર,
ઓ મીડિયા કર્મીઓ તમને શત શત વંદન વારંવાર.

કોઈનું એઠું અને થૂંકેલું તમે વિના સંકોચે ઉપાડ્યું,
જે જોવું ન ગમે એને છેક માથા સુધી અડાડ્યું,
તું જ ખરો છે, તું જ ખરો છે, અમારો તારણહાર,
ઓ સફાઈ કર્મીઓ તમારા પગને ચૂમુ પારાવાર.

સફાઈ અને મીડિયા કર્મી તમારો ખૂબ આભાર,
ડોક્ટરો-નર્સો તમારી પાસે કોરોના પણ લાચાર.

-અલ્પેશ કારેણા.

-

પુલવામા શહીદોને શત શત વંદન

મમ્મી તે ઝુલાવેલું પારણું મને બહું યાદ આવશે,
આપણા ઘરનું રૂડું બારણું મને બહું યાદ આવશે.

પપ્પા આવતા જન્મે દીકરો તો તમારો જ થઈશ,
બહેનની રાખડીનું સંભારણું મને બહું યાદ આવશે.

પ્રિયે તું ચિંતિત ના થા, તારા ગર્ભમાં મારો અંશ છે,
તે પ્રેમથી પીરસેલું ભાણું મને બહું યાદ આવશે.

ભારત જેવી માત, જગતનો તાત, વીરોનાં પ્રતાપ,
દેશનું બીજું પણ ઘણું ઘણું મને બહુ યાદ આવશે.

શહીદ થઈને જે રાજીપો છે એ કેટલોક વ્યક્ત કરું,
જે ગૌરવ હતું માં ભોમ તણું મને બહું યાદ આવશે.

ભલે હતો હું મુસ્લિમ કે હિંદુ, રક્ષા જ મારો ધર્મ છે,
મારા ફોઝી ભાઈનું ઉપરાણું મને બહુ યાદ આવશે.

-અલ્પેશ કારેણા.

-

ઉતરાયણના દરેક શસ્ત્રોનો ખેલ સંભળાવુ,
ચાલ, આજ તને એક પ્રેમકથા સમજાવુ.

ચિક્કી જેવી તારી મીઠડી વાતો,
ને લકઝર જેવી બોલકી આંખો,
સળીની માફક મનને તારા ચિતમા પરોવું,
ચાલ, આજ તને એક પ્રેમકથા સમજાવુ.

દોર હું ને પતંગ તુ, કાંઇક નવુ કરીએ,
તું વીંધા તો નભના બદબુદાને મળીએ,
હવામાં અનેરા આલિંગનનો અહેસાસ કરાવું,
ચાલ, આજ તને એક પ્રેમકથા સમજાવુ.

અગર કોઈ કાપશે તો દર્દ મને જ થશે ને!
પણ આપણી જોડી તો એમનેમ જ રહેશે ને!
વેરાન જંગલમા આપણુ યુગલ ચિતરાવું,
ચાલ, આજ તને એક પ્રેમકથા સમજાવુ.

ઉતરાયણના દરેક શસ્ત્રોનો ખેલ સંભળાવુ,
ચાલ, આજ તને એક પ્રેમકથા સમજાવુ.

-અલ્પેશ કારેણા.

-

એ વિવેકાનંદની થોડીક જ વાત છે...

વિવેક અને આનંદ પર એ સ્વામીનું રાજ છે,
દેશના યુવાનનાં આદર્શનો જેની પાસે તાજ છે.

આ વિશ્વમાં પડઘા તો એના અજર અમર છે,
આખી એસેમ્બલી ધુણાવવાનું એનું કામકાજ છે.

એડીથી ચોંટી જેણે દેશ માટે નિઃસ્વાર્થ ઘસી નાખી,
માટે એ ભગવાધારી પર સમગ્ર ભારતને નાજ છે.

લોકોએ સ્વામી વિવેકાનંદને પ્રેમ એ રીતે કર્યો કે,
પુરુષ હોવા છતાં દરેક શાહની એ મુમતાજ છે.

અફસોસ માત્ર એટલો કે ૧૫૭ વર્ષ પહેલાં જન્મ્યાં,
એની જરૂર તો અત્યારે એમ છે જેમ અનાજ છે.

- અલ્પેશ કારેણા.

-

અહીં અમુક રહસ્ય વર્ષો બાદ ખૂલે,
પછી ક્યાંય સમાય નહીં એટલા ફૂલે.

ભીડને સમજાવો કોઈ મને જવા દે,
પેલી મારી રાહ જુએ છે નદીના પૂલે.

અન્યથા આટલી મોટી સજા ન આપે,
તે બધું જ પતાવી દીધું હશે એક ભૂલે.

હાથ જોડી ઉભેલી વહુને સાસુએ કહ્યું,
બેટા તારો ઈશ્વર તો અહીં પારણે ઝૂલે.

તું કેહતો'તો ને કે શાળા મંદિર ના હોય,
ચાલ લઈ જાવ મારી પ્રાથમિક સ્કૂલે.

અલ્પેશ કારેણા.

-