ಭಾಗಶಃ ಚಿರಪರಿತವಾಗುಳಿದುಬಿಡುವ ಅರ್ಧ ತೊಯ್ದ ನಿಟ್ಟುಸಿರು, ಪ್ರಾಯಶಃ ಶಾಯಿಗೆ ದಕ್ಕಲಿಚ್ಛಿಸದ ಆರ್ದ್ರವಾದ ಕನಸಿನ ಚೂರು! ಬಹುಶಃ ಒಡೆದು ಬರೆದ ಬಿಸುಪಿರದ ಖಾಲಿ ಅಂಚೆ, ಮೂಲತಃ ನಿಶೆಯು ಹಡೆದ ಸುಕ್ಕು ಬಿದ್ದ ನೀರಸ ಕವಿತೆ!!
ಕನಸೊಂದು ಸೋಕಿ ಹೋಗಬಹುದು ಇಶಾರೆಯೊಂದು ಸದ್ದಾಗದೆ ಎದ್ದು ನಡೆಯುವಾಗ, ಎಲ್ಲವೂ ಸ್ಪಷ್ಟವಾಗಬಹುದು ನಿನ್ನೆಗಳ ಹೊದಿಕೆ ಇಂದು ಹೊಂದಿಕೆಯಾಗದಿರುವಾಗ; ಮಧ್ಯಂತರವೊಂದು ಬೇಕಾಗಬಹುದು ಬದುಕಿನ ಹಾದಿ ಗೋಜಲಾದಾಗ, ನೆರಳು ಬೆಳಕಿನ ಹರಿವು ನೆಲೆಕಾಣಬಹುದು ಭಾವಗಳ ಹರವು ಹಗುರಾದಾಗ...