Bheetar ke andheron par adharit hoga vyavhaar,
To kaise dhoond paaoge jag mein roshni ki bharmaar?

-

Kya mauka karam ka tab milega jab hoga dharam ka saath?
Kaise hoga vishwaas khudpar jab pakda hai vehem ka haath?

-

Ik androoni bechaini hai jo har waqt hi saath rehti hai,
Har pehre mein mere chehra apna chipaye rakhti hai,
Nirnay sabhi usi ki jakad mein simte hain mere,
Main usi ke haathon ki katputhli bankar jee raha hoon.

-

Aaina dekha aaj maine, jyada der ruk nahi paaya, chup gaya
Kuch kehna chah rahi thi aankhein, dekh nahi paaya, chup gaya
Labon par kuch bol umad rahe the, padh nahi paaya, chup gaya
Apne jaisa banana chaah raha tha vo aaina, himmat juta nahi paaya, chup gaya

-

Kayi pehlu jeevan ke suljhaane hain, shuruwat kahan se ki jaaye?
Dhairya aur ummed ke abhi to kayi silsile sajaane hain, shuruwat kahan se ki jaaye?
Sawaal batore hue hain hazaar, jawaabon tak pahuch paane ki shuruwat kahan se ki jaaye?
Thak raha hai hausla mera, uske chehre ko fir uncha uthaane ki shuruwat batao kahan se ki jaaye?

-

Kaun kiske sahare kis disha ki or badh raha hai, kise pata?
Mujhe bas itna pata hai ki main ab tere sahare kuch adhik apni hi or badh raha hoon.

-

Ek bhawandar mere bheetar ghoom raha hai jo dheere dheere har sakaratmak vichar, har asha ko apni lapet mein kheech raha hai,
Mere vyaktitva ke prateek jo lakshan hain unhein ek ek kar, apni or kheechkar, unhein vo apne hi aakar ka hissa bana raha hai,
Mere hi astitva ke kan kan se ab uski gati aur uske deh ko taakat milti hai,
Mera vajood ab khatma hote hote ek prachand bhawandar ka roop le chuka hai.

-

Chaar shabd kisike sunkar tum kyun ho gaye ho gumraah
Dhadkan ki vo saral pukaar kyun sunna nahi chahte
Jo hota nahi mehsoos use kyun kehte ho apna
Kyun bhatke dil ke kheechkar kaan use ghar wapas le nahi aate?

Kya dar hai aisa jo satata hai tumko aur rok leta hai sweekarne se apni hi pehchaan
Kya khuli hawa aur chaaron or phaila aakash tumhe raas nahi aate
Kab tak ban paaoge kathputli auron ke vichaaron ki
Kya apni awaz ko dekar udaan use ab azad nahi karna chahte?

Kya is joothi zindagi ki chaanv se is kadar kar li hai dosti ki baithe rehte ho mehfooz
Kyun nazron par padti sach ki dheemi si dhoop tum dekhna nai chahte
Sthir rehna kyun lagne laga hai tumhe prakruti ka mulayam sparsh
Kya gir jaane ke dar se vo pehla kadam tum lena nahi chahte?

-

Jo bolna chahe vo bol de aaj aur jo rokna chahiye use rok le,
Jo karna chahe vo kar le aaj aur jo rokna chahiye use rok le,
Jo badalna chaahe vo badal le aaj aur jo rokna chahiye use rok le,
Jo bhoolna chahiye use bhula de aaj aur jise rokna chahiye use rok le.

-

Anjaan kisi vyakti ne banaya ik aisa dastur,
Kar diya apnon se usne mujhko kaafi door,
Apne hi man ke jazbaaton ka safar main tay kar nahi paaya,
Haan, main us apne ko alvida keh nahi paaya.

-