#ಅಮ್ಮ
ಸೆರಗಿನ ಗಂಟಲ್ಲೆ ಸೊರಗಿದ ಕನಸುಗಳ ಕಟ್ಟಿ ಕಾಪಿಟ್ಟು
ನನಸಾಗಿಸಲು ನೆಮ್ಮದಿಯ ಮೂಟೆಯ ಕಣ್ಣಿನ ಕಪಾಟಿನಲಿ
ಕಾಣದಂತೆ ಬಚ್ಚಿಟ್ಟವಳು
ಕರುಳ ಕುಡಿಗಳ ಕಷ್ಟಗಳಿಗೆ
ತನ್ನೊಳಗೆ ಕಂಬನಿಯ ಕುಯಿಲಿದ್ದರು
ನಸು ನಕ್ಕು ನಾನಿರುವೆ ಎನ್ನುವ
ಮಹಾ ಮಾಂತ್ರಿಕಳವಳು..

-

ಸಖಿಯೇ..

ನಿನ್ನೀ ಅಧೀರ ನಯನಗಳ ಅನ್ವೇಷಣೆಗೆ ಸಿಕ್ಕೀತೇ ಅಂತರ್ಧಾನವಾದ ಆಗಂತುಕನಾ ಬಿಂಬವ
ಶೋಧಿಸದಿರು ನಿನ್ನೊಳಗೊಳಗೆ ಸಂಧಿಸದಿರು
ನೆನಪುಗಳ ಕುರುಹಿನ ಪ್ರಪಾತದೊಳಗಿನ ಪ್ರತಿಬಿಂಬವ..

-

ಇವಳೇ..

ನೀನೆಷ್ಟೇ ಹುಡುಕಿದರೂ ಈ ಖಾಲಿ
ಫಕೀರನ ಜೋಳಿಗೆಯಲ್ಲಿ ಬೊಗಸೆ ಪ್ರೀತಿ
ಹಬೆಯಾಡುತ್ತಿರುವ ನೂರು ಕನಸಿನ
ಪೊಟ್ಟಣಗಳಷ್ಟೇ ನಿನ್ನೀ ನುಣುಪು
ಕೈಗಳಿಗೆ ಸಲೀಸಾಗಿ ಸಿಗೋದು

ಇಷ್ಟೇ ಥತ್ ಇಷ್ಟೇ ಹರುಕು ಜೋಳಿಗೆಯಿದು
ಏಷ್ಟು ಕಾಪಿಟ್ಟರು ಕಂಬನಿ ಝರಿಯಾಗಿ
ಎದೆಯ ಇಕ್ಕಲುಗಳ ಬಳಸಿ ನೆಲವನಪ್ಪುತಿಹುದು..

-

ನಾ ಸದಾ ನಶೆಯಲ್ಲೆ ತೇಲುತ್ತಿರುವೆ
ಅವಳೊಲವಲ್ಲಿ ಇಲ್ಲವೇ ಇವಳ ಅಮಲಲ್ಲಿ..

-

ಒಮ್ಮೊಮ್ಮೆ ಬದುಕು ತೀರಾ ಶೋಚನೀಯ
ಇನ್ನೊಮ್ಮೆ ಮಲ್ಲಿಗೆ ಮೊಗ್ಗು ಬಿರಿದ ಘಮಲು
ಹೆಚ್ಚಾನೆಚ್ಚು ಗಡಿಯಾರದ ಮೊನಚಾದ ಮುಳ್ಳುಗಳು
ಸಮಯ ಗೋಚರಿಸಿದಕ್ಕಿಂತ ಚುಚ್ಚಿದ್ದೆ ಗುರುತು

-

ಹುಂಬು ಮನದ ನಿರ್ವಿಕಾರ ಭಾವಗಳ ಬಲೆಯೊಳಗೆ
ಹೊನ್ನ ಸ್ವಪ್ನಗಳು ಕೂಡಾ ಬಂಧಿಯಾದ ಮತ್ಸ್ಯಗಳು
ಬೆಸ್ತನ್ಯಾರಿಲ್ಲಿ ಮನದಂಡಲೆಯ ಮುನ್ನೀರಿನಲಿ??

-

ಕತ್ತಲೆತ್ತೆತ್ತಲು ಕಣ್ಣರಳಿಸಿರಲು ಛೇ ಇದೆಂಥಾ ಕನಸು!
ಈ ಇರುಳ ಬಾಳಿಗೆ ಬೆಳದಿಂಗಳ ಬೆಳಕೆ ಜೊತೆಗೂಡಿರಲು ಇನ್ನೇಲ್ಲಿ ಕತ್ತಲೆ; ಸುತ್ತಲೂ ಅವಳೊಲವ ಪ್ರಭೆಯ ಪ್ರಖರತೆಯಿರಲು..

-

ಅನಧಿಕೃತ ಭಾವಗಳಿಂದಾಗಿದೆ ಹಾರ್ಟು ಎಕ್ಸ್ಟ್ರಾ ಸೈಜು
ಆನಂದವಾಗಿಡೋಕೆ ಅದ್ಕೂ ಮಾಡ್ಬೇಕೀಗಾ ಎಕ್ಸರ್ಸೈಜು

-

#ರಾತ್ರಿ
ಕತ್ತಲ ಕನವರಿಕೆಯ ಕನಸಿನಲಿ
ಕೈಗೆಟುಕದ ಬೆಳಕಿನ ಹುಡುಕಾಟ..

-

#ಅಡ್ನಾಡಿ ಸಂಜೆ

ಸಂಜೆ ಹೊತ್ತಲ್ಲಿ ತಂಗಾಳಿಯ ಸುಳಿಗೆ ಸಿಕ್ಕ ನೀನ್ನೆನಪುಗಳು
ತೇಲಿ ನನ್ನೆದುರೇ ನುಸುಳಿ ತಬ್ಬಲೆತ್ನಿಸಿವೆ ತಬ್ಬಲಿಯಾದ ಮನವ
ಅತ್ತಿತ್ತ ಹುಡುಕುತಿಹ ನೋಟಕೆ ನೀ ಎದುರಾಗದೆ ಇರುಳಾವರಿಸಿ ಇರಿಯುತಿದೆ
ಇರಿತವೇನು ಹೊಸದಲ್ಲ ಎನಗೆ ಎದೆಯಂಗಳದಿ ನಿತ್ಯವೂ ನೆತ್ತರು ಬಸಿಯುತಿದೆ..

-