ತನುವೊಳಗೆ ಮನೆ ಮಾಡಿ
ಮನದೊಳಗೆ ಬಿಡಾರ
ಹೂಡಿರುವ, ನೀ ನನ್ನವನೆಂದು
ನನ್ನೀ ಹೃದಯದ ಪ್ರತಿ ಗೋಡೆಗೂ
ತಿಳಿದಿದೆ....
ಈಗೊಮ್ಮೆ ನಿನಗೆ ಕೊರಳ ಬಳಸಿ
ಮೆಲುದನಿಯಲಿ ತಿಳಿಸಲು
ಈ ಅಚಲೆಯ ಚಂಚಲ
ಮನವಿದು ಕಾತರದಿ ಕಾದಿದೆ,
ನಿನಗಾಗಿಯೇ ಪ್ರತಿಕ್ಷಣ ಹಂಬಲಿಸಿ
ಕಾದು-ಕಾದು ಸೋಲುತಿದೆ....
ಆಗಾಗ ಎದೆಯೊಳಗೆ ಒದಗುವ
ಸಿಹಿ ವಿಪತ್ತಿಗೆ ನೀನೇ ಅಪರಾಧಿಯಾದೆ,
ಹಾಗಾಗಿಯೇ ಆಗಾಗ ನಾನಂತೂ
ನಿನ್ನ ಕಾಡುವ ಹಾದಿಯ
ತುಳಿಯಬಯಸುವ ಯಾತ್ರಿಯಾದೆ....
ಪ್ರತಿಸಲವೂ ಹೆಚ್ಚಾಗುವ
ನಿನಗಾಗಿಯ ಹಂಬಲದ ಪ್ರೇಮಿಯಾದೆ,
ಹಂಬಲದೊಳಗೂ, ಇದ್ದಲ್ಲಿಯೇ
ಬೆಂಬಲಕೊಡುವ ನಿನ್ನ ಮುದ್ದು
ಮೌನವೇ ವರ್ಣಿಸಲಾಗದ ಭಾವದ
ಅಭಿಮಾನಿಯಾದೆ....
-