ഉള്ളിൽ പരാശക്തി തൻ വിളക്കം
പുറമേ ശിവഭക്തൻ പോൽ ഒരുക്കം
കർമ്മത്തിൽ നിഷ്ഠകൾ, പൂജകൾ, വിധികളും
കാണുമ്പോൾ വൈഷ്ണവൻ തൻ വഴക്കം
അംഗുഷ്ഠമാത്രനാം ആത്മായെ ചൊല്ലുമ്പോൾ
മൂന്നുമതേകമായ് അതിലൊതുക്കം!
കാലടി ദേശത്തു കാൽ പിച്ച വച്ചവൻ
കാഞ്ചിയും, കാകുസ്ഥൻ വാണ നാടും,
കാശിയും കണ്ണിൽ കുളിർമ്മകൾ നെയ്യുന്ന
കാശ്മീര, കേദാരമേറി പോയി,
സർവ്വം ത്യജിച്ചവൻ, സർവ്വജ്ഞപീഠവും
സർവ്വാധികാരത്തോടേറിപ്പോയി
ബൗദ്ധർ തൻ ശൂന്യത , ജൈനർ തൻ ന്യൂനത
ചാർവാകർ ചൊല്ലുന്ന ഭൗതികത,
പിന്നെ,
ചണ്ഡാളരെ പണ്ടു തീണ്ടാപാടകലത്തും
കണ്ടാൽ കലി തുള്ളും ബ്രാഹ്മണ്യത്തെ ,
എല്ലാമേ ബ്രഹ്മത്തെ ജീവനഭേതമായ്
ചൊല്ലുന്ന വേദാന്തം കൊണ്ടറുത്തു
വേദം പകുത്തോനോ അതോ സാക്ഷാൽ മഹേശനോ,
വാദം ജയിയ്ക്കാനായ് ഈ ജൻമ്മമാർന്നൂ ?
അല്ലെങ്കിൽ വാമനൻ പണ്ടൊന്നീ മുപ്പാര്,
കാൽ വച്ച പോൽ കേര-കേദാരങ്ങൾ ,
കാൽനടയായി കടക്കുവാൻ ഒക്കുമോ,
ഒന്നല്ല മൂന്നു തവണ തീർത്തും !
-