എനിക്ക്,
അവളുടെ ചുംബനത്തില് മുഴുകിപ്പോയ നിന്റെ ചിന്തകളെ പുനരുജ്ജീവിപ്പിക്കേണ്ടതുണ്ട്. അറിയാം, അവളുടെ ചുംബനം മരുഭൂമിയിലെ തുഷാരകണമാണെന്ന്. പക്ഷേ ചിന്തകള് മരവിപ്പിക്കുന്ന മൂടല്മഞ്ഞാവുകയാണ് അവള്. ചൂടുകായാനൊരു നെരിപ്പോട് പോലുമില്ലാത്ത ഒറ്റമുറിയില് നീ തണുത്തുവിറക്കുന്നുണ്ട്. അവളുടെ നിശ്വാസം കുളിര്ക്കാറ്റാവുകയാണ്. നിന്റെയുള്ളിലെ കൊടുങ്കാറ്റിനെ ഇല്ലാതാക്കിയേക്കാം...
അതിനാല് ഇനി നീ തീയാവുക. അവളുടെ ഓരോ നിശ്വാസത്തിലും ആളിപ്പടരുക. ചിന്തകള് കൊണ്ട് നെരിപ്പോടുണ്ടാക്കി ഉമിപ്പൊടി നിറച്ച് നീറിത്തുടങ്ങുക. നിന്റെ ജ്വലനത്തില് കവിതകള് പിറക്കട്ടെ...
-