പ്രണയത്തിൻ വിഭ്രമാന്തം
     നാവിൻതുമ്പിലിറ്റുന്നൊരു
നിണരസത്തുള്ളിയായി
      മാറട്ടെ ഞാനും.

-

വേരാഴ്ത്തിയെന്നാത്മാവിലെ
     കവിതകളൂറ്റും പെണ്ണേ,
വേറെയാർക്ക്, നിനക്കു ഞാൻ,
     തിമിർക്കുകെന്നിൽ.

-

ഇടിമുറിയിൽ
ഇടതിടിസംഘത്തിൻ
ഇടിസംഗമം!

-

കണക്കറ്റു കലഹിച്ചും
     ചേർത്തുപുൽകിപ്പുന്നാരിച്ചും
തിണർക്കുന്ന ചുണ്ടു വീണ്ടും
     വിടാതെയുണ്ടും

-

കോലം കെട്ടിയാടും പാടും,
     കൂട്ടിന്നാത്മതരംഗമായ്
കൂലംകുത്തിയൊഴുകുന്ന
     കലാപകേളീ.

-

കുറുമ്പും കുശുമ്പുമായി-
      ക്കലമ്പുന്ന കെട്ട്യോളായി
വെറുക്കാതെ വിറപ്പിക്കു-
      മിരുട്ടുമേളം.

-

എന്തിനേറെക്കാലം? നമ്മൾ,
     മൂന്നോ നാലോ വാക്കടുപ്പം,
നൊന്തിണങ്ങിപ്പിണങ്ങുന്ന
     കലിപ്പിൻ താളം.

-

കുവളം

-

പാട്ടു കേൾക്കെപ്പകയ്ക്കും
ഞരമ്പുകൾ
പൊട്ടി രക്തം പരക്കുന്നു,
പാർക്കിലെ
ബഞ്ചിലെന്നും ശിരസ്സറ്റ
രൂപങ്ങൾ
നെഞ്ചിലാർക്കുന്നു ഭീതിതൻ
പേക്കടൽ.

-

ഒന്നിനു വേഗമെഴുന്നേൽക്കാം
രണ്ടിനു കൈകൾ നീട്ടീടാം
മൂന്നിനു മൂക്കു പിടിച്ചീടാം
നാലിനു നാക്കുകൾ നീട്ടീടാം
അഞ്ചിനു ബഞ്ചിലിരുന്നീടാം

-