એવી કોઈ વ્યક્તિ ખાસ નથી હોતી,
દુઃખની વેળાએ જે પાસ નથી હોતી.
કરે છે અહીં માણસ માણસની મદદ,
જરૂર ખુદાની બારેમાસ નથી હોતી.

-

મહેકતા બોલ નથી, લાગણી હોય છે,
મીઠી જલેબી નહીં, ચાસણી હોય છે.
આવી ને બેસે પાસે, હસે ને જતા રહે,
એથી વધુ ક્યાં મારી માંગણી હોય છે?

-

સમાધિમાં બેઠી છું પણ ધ્યાન નથી લાગતું,
ધ્યાન લાગે એવું આજે હવામાન નથી લાગતું.
વિચલિત કરે છે મુજને ખુદ મારા જ વિચારો,
ખુદની જોડે લડું કિંતુ એ સમાધાન નથી લાગતું.

-

કઈ બાજુની છે હવા ચકાસવું જોઈએ,
દૂર જઈને પાસે કોણ તપાસવું જોઈએ.
ડરતા હોય વાવાઝોડાથી ના એમને કદી,
ખુદનું ઘર સાગર કાંઠે વસાવવું જોઈએ.

-

નક્કી નથી મંજીલ તોય એ ભટકતું નથી,
બંજર ધરા પર વાદળ કદી વરસતું નથી.

વિજળી વિના હૃદય એનું ધબકતું નથી,
અકારણ કોઈ વાદળ કદી ગરજતું નથી.

ખુદને ખોઈ આપે છે જળ જીવન કાજ,
કે જાણે છે એનાં વિના કશું મહેકતું નથી.

પરોપકાર નહી તો બીજું શું માનવું આને,
વાદળને પકડીને તો કોઈ નીચોવતું નથી.

બદલે છે નિત-નવા ને કેવા-કેવા એ રંગ,
ખુદની છાપ કિંતુ નીરમાં એ છોડતું નથી.

-

આવે તળિયું
માણસનું વેત જો
ભરો તરત

-

ફુલની ખુશ્બુ
અત્તરમાં પતંગિયું
શીશીથી ભાગે

-

માણસ માણસ વચ્ચે, તું ભેદભાવ ન કર,
ને રૂઝાય નહિ કદી, એવાં કોઈ ઘાવ ન કર.
ન થઈ શકે જો વધું તારાથી, કર એટલું કે,
ડંખે ગરીબને, એવાં કોઈ હાવભાવ ન કર.

-

કોઈને શાયરી શબ્દોની સજાવટ લાગે છે,
ને કોઈને એ લાગણીની બનાવટ લાગે છે.
શાયરને નહી પૂછો શાયારીને શું લાગે છે?
શાયરીને શાયર બન્નેની મિલાવટ લાગે છે.

-

ભળે છે બધીજ નદીઓ, છતાં એ ધરાતો નથી,
વરસાદનાં પાણીથી, કદી સાગર ભરાતો નથી.
છે શિસ્ત, સમન્વય, ને સંતુલન માટે સુકાતો નથી,
દરિયા જેવો દરિયો ભરતી વિના ઉભરાતો નથી.

-