જેને તમે ઓળખો છો હું એ નથી,
ને ઓળખું છું હું જેને હું એ નથી.
ગમે તે નામે તમે બોલાવો મને કીંતુ,
કાલે હું જે હતી આજે હું એ નથી.

-

વાસ્તવિકતાથી બચીને ક્યાં જશો?
ને આ સંસારને ત્યજીને ક્યાં જશો?
લો તમે આઝાદ કરો જે કરવું હોય,
બધું કરી કહો અંતે તમે ક્યાં જશો?

-

જૂની યાદો તમે અકબંધ રાખો,
ભલે ન બોલવાનો સંબંધ રાખો.
આપો થોડી જગા દિલમાં મને,
દ્વાર બીજા ભલે સૌ બંધ રાખો.

-

બધી ગાંઠ સરળતાથી ખોલી નથી શકાતી,
ને લાગણી કોઈ તાજવે તોલી નથી શકાતી.
દિલમાં રહી જાય છે દિલની ઘણીય વાતો,
હોઠ સુધી જે આવે ને બોલી નથી શકાતી.

-

બોલાવું છું ક્યારનો, પણ એ નથી બોલતા,
ને ખખડાવું છું દ્વાર, પણ એ નથી ખોલતા.
બેઠા છે રિસાઈને તેઓ, મારી એક ચૂકથી,
કહેવું છે ભૂલનું કારણ, પણ એ નથી પૂછતાં.

-

ના ગમતું કામ પણ ક્યારેક કરવું પડે છે,
ને ગરજ પડે દરેક માણસે નમવું પડે છે.
નથી કશું હાથમાં સમજાય છે ત્યારે જ,
એક શ્વાસ લેવા જયારે ઝઝૂમવું પડે છે.

-

નથી સમય કોઈ કને, કોઈને આપવાનો,
સારો છે એ માપદંડ, સંબંધને માપવાનો.
કિંમત જેની ન હતી, હતો એજ કિંમતી,
સમય શૈશવનો, શું હવે પાછો ફરવાનો!

-

એવી કોઈ વ્યક્તિ ખાસ નથી હોતી,
દુઃખની વેળાએ જે પાસ નથી હોતી.
કરે છે અહીં માણસ માણસની મદદ,
જરૂર ખુદાની બારેમાસ નથી હોતી.

-

મહેકતા બોલ નથી, લાગણી હોય છે,
મીઠી જલેબી નહીં, ચાસણી હોય છે.
આવી ને બેસે પાસે, હસે ને જતા રહે,
એથી વધુ ક્યાં મારી માંગણી હોય છે?

-

સમાધિમાં બેઠી છું પણ ધ્યાન નથી લાગતું,
ધ્યાન લાગે એવું આજે હવામાન નથી લાગતું.
વિચલિત કરે છે મુજને ખુદ મારા જ વિચારો,
ખુદની જોડે લડું કિંતુ એ સમાધાન નથી લાગતું.

-