நினைத்ததையெல்லாம் 
சொல்லிவிடுகிறார்கள்
சொல்வதையெல்லாம் 
நினைத்துப் பார்க்கையில்தான் 
என்னவொரு பைத்தியக்காரத்தனம்
செய்யும் தொழிலே தெய்வமென்று 
வாய்கூசாமல் சொல்லிவிட்டு
ஒரு தொழிலை செய்தால்
இந்த வேலையா என்று 
ஏளனம் செய்கிறார்கள்
வேறோரு தொழிலை 
கையிலெடுத்தால் இதற்கு
அது எவ்வளவோ பரவாயில்லை
என்றொரு சலிப்பு

எந்த சொல்லுக்கும்  செவிசாய்க்காமல்
புதியதொரு தொழிலை 
கையிலெடுக்கையில்
மீண்டும் அதே ஏளனமும் சலிப்பும்
மாற்றி மாற்றி உலாவுகையில்தான்
செய்யும் தொழில் தெய்வமென்பது
குறிப்பிட்ட தொழில்களுக்கு 
மட்டுமே; மற்றவையெல்லாம்
சவக்கிடங்கில் உழலும் சாத்தான்களே

வருமானம் தந்தால் தெய்வமாகவும்
வருமானம் குறைந்தால் சாத்தானாகவும்
மதிப்பிடப்படுவதற்கு
பழக்கப்படுத்தப் பட்டுள்ளன
இச் சொற்கள்

-

மெய்மையில்
குழந்தைகள்தான் 
நம்மை குணப்படுத்த
மருந்து கொடுப்பவர்கள்

அவர்களுடன்
கற்பனை மாவில் 
தோசைச் சுடும் தருணம்
எவ்வளவு இனியதென்றால் 
அது முறுகலான 
இன்பத்தை தரக்கூடியது

துவக்கத்தில் 
அடுப்பை மட்டுமல்ல
நம் பால்யத்தையும் 
அது பற்றவைக்கும்

தோசைத் திருப்பிக்கும் 
தோசைக் கல்லுக்கும் 
இடையில் 
பதமாகும் நினைவது
பரிமாற பரிமாற 
தீராதவேளை அதுவன்றோ

-

யாரோ தன்னை
மலை உச்சியிலிருந்து
உருட்டிவிட, மற்றொரு
மலை விளிம்பில் தொட்டு எழ
முயல்கிறான் ஆதவன்
அதற்குள் பெரிய பெட்டியுடன்
வந்த பூச்சாண்டி மாமா
கடத்திச் செல்வதற்குமுன்
வீடு சென்றடைய
வேண்டுமென்பது உத்தேசம்;
ஆதவனை காப்பாற்றும் முயற்சியில்
வாகனமும் நானும் வேகமெடுக்க,
மலைகளுக்குள் மறைந்திருப்பதாக
ஆதவனிடமிருந்து குறுஞ்செய்தி;
பத்திரப்படுத்திக்கொண்டு நகர்ந்தேன்

-

ஆர்ப்பரிக்கும் கடல் 
வேண்டுவதெல்லாம் 
எங்கே அந்த மௌனம்
என்பதுதான்

கரையில் மோதி! மோதி! 
மௌனத்தில் கலைகிறது கடல்
கரைக்கு தேவையெல்லாம் 
கடலின் காதல் மட்டுமே

-

இடம்பெயர்தல்
மனிதருக்கு மட்டுமா என்ன?
நீருக்கும் தான்..
நீருக்கு மட்டுமா என்ன?
கற்களுக்கும் தான்..
கற்களுக்கு மட்டுமா என்ன?
வேர்களுக்கும் தான்..
வேர்களுக்கு மட்டுமா என்ன?
சிந்தனைக்கும் தான்..
சிந்தனைக்கு மட்டுமா என்ன?
எல்லாவற்றுக்கும் தான்..
இன்னும்
எத்தனை எத்தனையோ
இடம்பெயர்வுகள்
இன்னமும் நிகழ்ந்துகொண்டுதான்
இருக்கின்றன..
வேடிக்கை பார்ப்பவனால்
என்ன செய்ய முடியும்..?
அடுத்த வேடிக்கைக்கான
இடம்பெயர்வைத் தவிர..

-

டாப்சிலிப்பும்
பரம்பிக்குளமும்

👇🎍👇🍃👇🍁👇

-

வெறுமை 
என்றுணரப்பட்ட வேளையில்
அடுத்து என்ன செய்வதென்று
தெரியாமல், நிர்க்கதியாக நிற்கும்
கையறுநிலை, மிக மிகக் கொடியது.
அத்தருணத்தில் எந்த முடிவையும்
எடுத்துவிடாதீர்கள். சற்றேனும்
இயற்கையிடம் சரணடைந்து
மீண்டும் வாருங்கள்
அங்கொரு தொடக்கம் 
நிச்சயம் இருக்கும்...

-

பேருந்தில்
நடத்துனரிடம்
பயணச்சீட்டை
உரத்த குரலில் 
கேட்கவே
இப்பொழுதுதான் 
தைரியம் பிறந்துள்ளது

அதற்குள் 
என்ன அவசரம்
கொஞ்சம் பொறு

உன்னிடம்
என் விருப்பத்தைச்
சொல்ல கொஞ்சம்
காலமெடுக்கும்

அதுவரை நிலைக் 
கண்ணாடியின் முன்பு 
பயிற்சி பெற்று 
வருகிறேன்

-

மலர்தல்..

மீண்டும் மீண்டும் மலர்வது
மனதிற்கு பிடிக்கும்
மீண்டும் மீண்டும் மலர்தல்
மனதிற்கு ஓர் இதம்
இம் மலர்தல்
எவ்வளவு அற்புதமானது

விந்தையானதும் கூட

-

நேற்றிரவு
மின்சாரத் தடை

நடுவிரலும்
மோதிரவிரலும்
கட்டைவிரலுடன்
கூடிநின்று கதைக்க

சுண்டுவிரலும்
ஆட்காட்டிவிரலும்
செவிகொடுத்து நின்றன

வீட்டுச் சுவற்றில்
அசைந்ததொரு மான்;
விளக்கு வெளிச்சத்தில்

-