ಮೋಕ್ಷವ ಮುಟ್ಟಲು ಬಯಕೆಯ ಕೋಳ!
ಬಯಕೆಯ ಬಿಟ್ಟರೆ ಮೋಕ್ಷ ನಿರಾಳ! 😊😊

-

ಯಜಮಾನಿ ತವರಿಗೆ ಹೋಗುವ ದಿನ,
ಯಜಮಾನನಿಗೆ ಹೆಚ್ಚುವ ಸಜೆ..
ಆ ದಿನಗಳಲ್ಲಿ ಕೆಲಸದಾಕೆಗೂ ಯಜಮಾನಿ ನೀಡುವಳು *ವೇತನ ಸಹಿತ* ರಜೆ!. 😊

-

ಕಾರ್ಮಿಕ ದಿನ:-
ಯಾರು ಬಂದರೇನು ಯಾರು ಹೋದರೇನು ನಾಯಕ
ನಿನ್ನದು ತಪ್ಪದ ಬವಣೆಯ ಕಾಯಕ
ಜೀತದಲ್ಲಿ ನಿನ್ನ ಭವಿಷ್ಯ ಸ್ಥಿತಿ ಅತಂತ್ರವಾಗಿತ್ತು ಅಂದು
ಭವಿಷ್ಯನಿಧಿಯಿಂದ ಸ್ವಲ್ಪ ಚೇತರಿಕೆ ಇಂದು
ಕಾಯಕವೇ ದೇವರು ಇದುನಿನ್ನ ವಾಣಿ
ಇದರಿಂದ ಏಣಿ ಏರುವ ನಿನ್ನ ಧಣಿ
ನೀನುಮಾಡುವೆ ಕೂಲಿ ನಮ್ಮ ಹೊಟ್ಟೆ ಕಾಯುವ ಬೇಲಿ
ನಿನ್ನದು ಮುಗಿಯದ ಸಜಾ ಇಂದೊಂದಿನ ನಿನಗೆ ರಜಾ

-

ಪರದಾಟ

ನಡುವಿನ ನಿಲ್ದಾಣ ಈ ಜಗ
ಹುಳ ಹುಪ್ಪಡಿ,ಇರಲಿ ಖಗ,ಮೃಗ
ಮಾನವನಿಗೂ ತಪ್ಪದ ಪರದಾಟದ ಬವಣೆ
ಮಾಡುತ್ತಿರುವರು ಎಲ್ಲ,ಹಾಕಿದಂತೆ ಆಣೆ!.

ಎರಡು ದೋಣಿಯ ಮೇಲೆ ಕಾಲು!..
ಪರದಾಟ ನಿಮ್ಮ ಪಾಲು!.😊

-

... *ನೀನೆಂದರೆ?!*...
ನೀನೆಂದರೆ ಭಾವದ ಹೊನಲು.. ಪಡುವಣದ ಮುಗಿಲು!.
ನೀನೆಂದರೆ ಚೈತ್ರದ ಗಾನ.. ಕೋಗಿಲೆಯ ವಿರಹ ಧ್ಯಾನ!.

ನೀನೆಂದರೆ ಸ್ವಾತಿ ಹನಿಯ ಮುತ್ತು.. ದೇವತೆ ಬರುವ ಹೊತ್ತು!.
ನೀನೆಂದರೆ ಚಳಿಗಾಲದ ಬೆಚ್ಚನೆ ಭಾವ.. ಹೃದಯ ಜೀವ.!.

ನೀನೆಂದರೆ ಭೂ-ಆಕಾಶ ಮಿಲನ,. ನನ್ನ ಬಾಳ ಚಲನ!.
ನೀನೆಂದರೆ ಚೆಲುವಿನ ಅಚ್ಚರಿ.. ಹೊಳೆವ ನವಿಲು ಗರಿ!.

ನೀನೆಂದರೆ ನಾ ಮೆಚ್ಚಿದ ಹೊತ್ತಿಗೆ.. ನನ್ನಅಮಲಿನ ಮತ್ತಿಗೆ!.
ನೀನೆಂದರೆ ಸಂಸ್ಕಾರ ಶೀಲ... ಬ್ರಹ್ಮನ ಕುಸುರಿಯ ಫಲ!.

ನೀನೆಂದರೆ ಮಗುವಿನ ನಗು.. ವ್ಯತ್ಯಾಸವಿಲ್ಲನಿನಗು-ಮಗುವಿಗು!.
ನೀನೆಂದರೆ ಸೌಂದರ್ಯದಿ ಅಪರೂಪ... ನನ್ನ ಬಾಳ ದೀಪ!.

-

**ರಿಯಾಯಿತಿ**
ಪುರಾಣದಿ,ಸ್ವರ್ಗವೇರಲು, ಯೌವ್ವನ ಪಡೆಯಲು ಸಿಕ್ಕವು ವರಗಳ ರಿಯಾಯಿತಿ.
ಈಗ ಹಾಗಾಗಲು ನಾನಲ್ಲ ಯಯಾತಿ! 🙂

ತುಂಬಿ ತುಳುಕುತ್ತಿದೆ ಈ ದೇಶ!
ಎಲ್ಲೆಡೆ ರಾಜಕೀಯ ಪಕ್ಷಗಳು ನೀಡುತ್ತಿವೆ ರಿಯಾಯಿತಿ!.
ಅದಕ್ಕೇ ಅವಳು *ಭಾರ ತಿ* !.

ಸೂಕ್ಷದಿ ಗಮನಿಸಿ ಪಕ್ಷಗಳು ನೀಡುವ ರಿಯಾಯಿತಿ!
ಮತ ಹಾಕುವಾಗ ಯೋಚಿಸಿ
ಉಪಯೋಗಿಸಿ ಸದ್ಮತಿ!😊

ಅರ್ಧ ಬೆಲೆಯದ್ದು!! ವಸ್ತ್ರ
ಅರ್ಧವಾಯಿತು!😊ವಿವಸ್ತ್ರವಾಯಿತು
ರಿಯಾಯಿತಿ ಅರ್ಥವಾಯಿತು😊

-

ಆಸೆಗೆ, ಒತ್ತಾಸೆ. ಕಾರ್ಯದ ಹಿಂದಿನ ಭಾವ ಸೂಕ್ತವಾಗಿರೆ ,ಬೆನ್ನ ಮೇಲೆ ಕರ, ಅದುವೆ ಸಹಕಾರ.

-

*ಹಾಸಿಗೆ*
ಸೂರುಗಳ ಮೇಲೆ ಸೌರ ಹಾಸಿಗೆ!
ನಿಲ್ಲದ ವಿದ್ಯುತ್ ಇರುವಾಗಲೂ ಬೇಸಿಗೆ!!.

ಚಾಚದಿದ್ದರೆ ಕಾಲು
ಇರುವಷ್ಟು ಹಾಸಿಗೆ!
ಮುಂದೆ ಪರದಾಡಬೇಕು
ಪ್ರತಿ ಕಾಸಿಗೆ!.

ಚಾಚಿದರೆ ಕಾಲು ಇರುವಂತೆ ಹಾಸಿಗೆಯಿಂದ ಹೊರಗೆ!
ಮನ ವಾಲೀತು ಸಲ್ಲದ ದುರಾಸೆಗೆ!.

-

....ಮೀಸಲು.....
ನಿನ್ನ ನಡತೆಯಿಂದ ಸುಮನವ ಸೂಸಲು
ನನ್ನ ಹೃದಯವಿಟ್ಟೆ ನಿನಗಾಗಿ ಮೀಸಲು!

ನಾನು ಸರ್ಕಾರದ ಆ ಗುರಿಯ ಮುಟ್ಟಲು
ದಾಟ ಬೇಕು ಆ ಎಲ್ಲ ಮೀಸಲು!.

ಇಂದೂ ಬರಲಿಲ್ಲ ಅವರು ಓಟು ಹಾಕಲು!..
ಇಟ್ಟರು ಮನವ *ಮೀಸಲು* ಪ್ರಜಾಪ್ರಭುತ್ವವ ಅವಮಾನಿಸಲು!

-

.... ಸುಳಿವು....
ಎಲ್ಲತನದಲ್ಲಿ ಬಲ್ಲಿದನಾಗಿ ಎಲ್ಲರ ಮರೆಯುವವಗೆ,
ಏನೂ ಇಲ್ಲದಂತಾಗುವ ಶಿಕ್ಷೆಯ ಸುಳಿವು ನೀಡದು ವಿಧಿ!.

ಸುಳಿವು ನೀಡದೇ ಬರುವುದು ದುಂಬಿ!
ಆದರೂ ನಿತ್ಯ ಬೇಸರಿಸದೇ ಹೂವುಗಳು ಕಾಯುವವು ಮಕರಂದವನ್ನು ತುಂಬಿ,
ಒಲವ ನಂಬಿ!

ಬಂದಂತೆ ಭಾವಗಳ ಹರಿವು.
ಹನಿಗವನ, ನೀಳ್ಗವನ ವಾಗುವ ಸುಳಿವು ನೀಡದು!

-