Guzarati Hi Nahin Hai Shaam Hamse
Bina Tere Bina Tere Qasam Se
Yahi Jana Hai Hamne Door Rehkar
Nahin Reh Payenge Ham Door Tumse
Ruko,Baitho, Abhi Na Jaao Uth Kar
Yahi Ik Baat Kehni Thi Sanam Se
Chhudakar Haath Gar Tum Chal Pade Toh
Katega Kis Tarah Phir Waqt Hamse
MaiN Tumse Door Hokar Sochti HooN
Mohabbat Ho Rahi Hai Mujhko Tumse
Jhagad Kar Ke Bhi Dekho Zulm Kaisa
Qareebii Badh Gayii Hai Meri Tumse
Khudaya ! Dekh Kar AankheN Tumhari
Thithak Kar Reh Gayi HooN Ekdam Se
Tumhara Naam,Yeh Chehra,Yeh BaateN
Mujhe Sab Yaad Hai Pichhle Janam Se
Kaho Ab Kis Tarah Keh DooN Ki Meri
Ghazal Ko Ishq Hai Teri Nazam Se
Priyam Hai Chaand Ishwa Chaandani Hai
Yeh Duniya Keh Rahi Hai Ham Se Tumse
-