*म्हाचलियो! किछ अपणिआँ प्हाड़ी भासा दा भी मान करा
लोक भी कर’गे, पैह्ल्लैं अपणी अप्पूँ ता पणछाण करा
म्हारिया बोलिया बिच मठास ऐअसाँ इसा जो अपनाणा
एह कोई घड़ियो गप्प नीं ऐ, इतिहास इसा दा परुआणा
एह भासा ऐ म्हारी सभ्यता, असाँ इसा जो चमकाणा
ग़ज़ल, झँझोट्टी, गीत, सुहाग्गाँ जो इस बिच इक जान करा
लोक भी कर’गे, पैह्ल्लैं अपणी अप्पूँ ता पणछाण करा
’म्हाचलियो! किछ अपणिआँ प्हाड़ी भासा दा सम्मान करा*
**एह धर्ती द्योआँ दी सैल्ले चिट्टे इसा दे हन पर्बत
गोड़ी-काळी चिक्क इसा दी, नदियाँ दे पाणी सर्बत
मँदराँ बज्ज’न संख सह्णाइयाँ, मेळेयाँ बिच बज्जे नौबत
उच्चेयाँ रिह्ड़ेयाँ बाग उगान्दे दिक्खा प्हाड़ियाँ दी हिम्मत
भासा ऐ ताँ म्हाचल भी ऐ, जिंद इस पर कुर्बान करा
लोक भी कर’गे, पैह्ल्लैं अपणी अप्पूँ ता पणछाण करा
म्हाचलियो! किछ अपणिआँ प्हाड़ी भासा दा भी मान करा!**
***महासुई, सिरमौरी, बघाट्टी,क्यूँथळी भी ता प्हाड़ी है
मंडियाळी, चंबियाळी, कहलूरी,काँगड़ी भी ता प्हाड़ी ऐ
नूरपुरे ,ऊन्ने, गगरेट्टे दी बोल्ली भी प्हाड़ी ऐ
इक हन रीत रुआज असाँ दे, भासा म्हारी प्हाड़ी ऐ
‘साग़र’ इसदे सुआस्से तायैं जीवन अपणा दान करा
लोक भी कर’गे, पैह्ल्लैं अपणी अप्पूँ ता पणछाण करा
’म्हाचलियो! किछ अपणिआँ प्हाड़ी भासा दा भी मान करा***
*-स्वर्गीय मनोहर शर्मा साग़र पालमपुरी*
-