राग लोभ मत्सराची आज करुया खांडोळी
जात पात द्या आहुती चला पेटवूया होळी
ऋतू वसंत घेऊन सण शिमग्याचा आला
ज्वाला त्या धगधगती पहा कशा गगनाला
हेवे दावे विसरून दूर सारू वैर भाव
सर्व धर्म एक मानू सोडू सारे भेदभाव
भांग पिऊ प्रेमरूपी नशा चढवू नेकीची
बोबो बोबो बोंब मारू मिठी मारुया एकीची
नांदू गुण्या गोविंदाने रंग रंगात मिसळू
निळा भगवा हिरवा चला आनंदाने खेळू
हाच असे क्षण खरा चला खेळूया रे होळी
गोड धोड भरू मुखी आज पुरणाची पोळी
-