ಶರಣಾದ ಮೌನದಲ್ಲಿ
ಕರಗಿದ ಕನಸುಗಳೆಷ್ಟೋ?

-

ಆಗಸದ ಕಡು
ಕೆಂಪಿನ ಮೌನವ
ನೋಡಿ
ಮೌನವಾಗದವರಾರು...?

-

ಅವಳು ಮುಡಿದ ಮಲ್ಲಿಗೆಯ
ಶುಭ್ರ ಚೆಲುವ ಆರಾಧಿಸಲೇ..?
ಇಲ್ಲ...ಅವಳ ಅಮೃತದಂತಹ
ನಗು ಮೊಗವ ಬಣ್ಣಿಸಲೇ...?

-

ಹೇ ಮುದ್ದಿನ ಮಳೆಯೇ...
ಅವಳ ನೆನಪಗಳ ಮರೆತು ಮೌನವಾಗಿದ್ದ ನನ್ನ ಮನಕ್ಕೆ
ನಿನ್ನ ತುಂತುರು ಹನಿಗಳ
ಸಿಂಪಡಿಸಿ ಅವಳ
ನೆನಪುಗಳ ಕಾರಗೃಹದಲ್ಲಿ ಬಂಧಿಯಾಗಿಸಬೇಡ...
ಎಷ್ಟು ಶ್ರಾವಣಗಳು
ಮುಗಿದು ಹೋದವು
ಅವಳು ನನ್ನ ಮರೆತು...
ಅವಳ ಅದೆಷ್ಟು ಆಣೆಗಳು
ಅಳಿಸಿ ಹೋದವು
ಒಲವ ಸಿಂಚನವಿಲ್ಲದೆ...
ಹೇ ಮುದ್ದಿನ ಮಳೆಯೇ
ನನ್ನೂರಿನಲ್ಲಿ ಸುರಿಯಬೇಡ
ಎಲ್ಲ ಮರೆತು ಬರಡಾದ
ಅವಳ ಮನದ ಅಂತಃಪುರದಲ್ಲಿ
ಅಮೃತಧಾರೆಯಾಗಿ ಬಿಡು
ಅಷ್ಟೇ ಸಾಕು ನನಗೆ...

-

ಭಾವಗಳ ಹಸಿರೂರಿಗೆ
ನೆನಪುಗಳು ಸಂಚಾರ
ಹೊರಡುತ್ತಿವೆ...
ಹುಚ್ಚು ಮನವೇ
ತುಸು
ಸಮಾಧಾನಿಯಾಗಿರು...

-

ಮಮತೆಯೆಂಬ
ಅಮೃತವ ಸಿಂಪಡಿಸಿ
ಹರುಷದ ಬಟ್ಟಲ
ಹಿಡಿದು
ಮೆರೆದ 'ಮೌನ'ವೇ...

ನಿನ್ನ ಸವಿ ನೆನಪುಗಳ
ನನಗೆ ತೋಚುವ
ಸಾಲುಗಳಲ್ಲಿ ಬಂಧಿಸಿ
'ಕವಿತೆ'ಯಾಗಿಸುವದು
ಅಷ್ಟು ಸರಳವೇ
ಒಲವೇ?

-

ಭರವಸೆಯ ಆಗಸದ
ತುಂಬೆಲ್ಲಾ ಬರೀ
ನೋವಿನ ಕಿಂಡಿಗಳು...

-

ಮತ್ತದೇ ಹತಾಶೆ..
ಭಾವಗಳ ಯಾರೋ
ಕಬಳಿಸಿ ಹೋಗುವಂತಹ
ಹೊತ್ತು...ಮಾತುಗಳಲ್ಲಿ
ಹೇಳಲು ಏನು
ಉಳಿದಿಲ್ಲ...
ಮೌನವೇ ಚಂದವೆನಿಸುತಿದೆ..

-

ನೆನಪುಗಳ ಮಳೆಯಲ್ಲಿ
ನೀನೇ ಕೊಡೆಯಾಗಿ
ಬರಬಾರದೇನು ಒಲವೆ...
ವಿರಹದಲ್ಲಿ ತೊಯ್ದು
ತೊಪ್ಪೆಯಾಗಿರುವ ನನ್ನ
ಕಾಪಾಡಲು...
ಜೀವ ನದಿಯಾಗಲು...

-

ಮನೆಯ ಮುಂದಿನ
ತುಳಸಿ ಪೂಜೆಯ
ಸಂಭ್ರಮ ಸಾಂಗತ್ಯವಾಗಲು
ನಿನ್ನ ನೆನಪಗಿಂತ
ಬೇರೊಂದು ನೆನಪು
ಬೇಕೆನು ಗೆಳತಿ...

ನಂಗಿಷ್ಟದ ಕಾರ್ತೀಕ
ಮಾಸದಲ್ಲಿ ಹಚ್ಚುವ
ದೀಪಗಳ ಸಾಲುಗಳಿಗೂ
ನನ್ನೆದೆಯ ಅಂಗಳಕ್ಕೂ
ನಿನ್ನದೇ ಧ್ಯಾನ,ನನ್ನ
ಮೌನಕ್ಕೂ ಸನ್ಮಾನ...

"ಇನ್ನೂ ನೀ ನನ್ನ"
ಮರೆತಿಲ್ಲವೆಂದು
ಸಂತೈಸುವ ನನ್ನ
ಪದಗಳ ಬಿನ್ನಾಣಕ್ಕೂ
ಒಲವಿನ ಭಾವಕ್ಕೂ
ನೀನೆ ಕಾರಣ...

-