ഇനിയില്ല ഈഞാനും
ഈയെന്റെ ഈണവും..
ഇനിയില്ല ഇളകുന്നീ ഇലയും
ഈ ഇലഞ്ഞിതൻ ഇമ്പവും..
ഇംഗിതഭംഗം ഈയുള്ളവന്റെ
ഇടനെഞ്ചിൻ ഇടതായി ഇടിച്ചിറങ്ങിയപ്പോൾ..
ഇവിടെയീ ഈറൻ ഇഴച്ചേർന്ന
ഇത്തിരിമണ്ണിൽ ഈഞാനും
ഈയെന്റെ ഈണവും ഇല്ലാതെയായി.

-

കാറ്റ് കടലിൻ കാതിൽ
കള്ളകഥകൾ കെട്ടഴിച്ചു,
കടലതു കേട്ടു കുതിച്ചതോ കരയിലേക്ക്..
കോമരമായി കലിതുള്ളി കടൽ
കരയുടെ കവിളിൽ കണ്ണീർച്ചാലു കീറി.

കണ്ഠമിടറി കരഞ്ഞു കര
കടലിന് കാരുണ്യമില്ലാത്ത കാര്യമോർത്ത്.
കണ്ണിറുക്കി കുലുങ്ങിച്ചിരിച്ചു കാറ്റപ്പോൾ
കടലിനും കരയ്ക്കും കുറുകെ
കടന്നുപോയി..

-