Paid Content

-

എനിക്ക് മഴയാകണം.ഒരു കാർമുകിലിന്റെ ഗർഭത്തിൽ ഉറങ്ങി, തെക്കൻ കാറ്റിന്റെ കൈകളിലേറി പറന്നു നടന്ന്,ഏതോ ഒരു കൂറ്റൻ മൊട്ടക്കുന്നിന്റെ നെറുകിൽ ചുംബിച്ച് ഭൂമിയിലേക്ക് ഇറങ്ങി വന്ന ഒരു വേനൽ മഴ.
പുതു മഴയ്ക്കായി വായ പിളർന്ന് കാത്തിരിക്കുന്ന വേഴാമ്പലുകൾക്കും സൗന്ദര്യം വറ്റിയപ്പോൾ കാമുകൻ ഉപേക്ഷിച്ചു പോയ വാടി കരിഞ്ഞ പൂക്കൾക്കും ദാഹജലം നൽകണം.

ക്ലാരയുടെ രതി ഭാവം മുഴുവൻ ഒപ്പിയെടുത്തെന്ന് ആരോ ഭംഗി വാക്കോതിയത് മനസ്സിൽ നിറച്ച് മണ്ണാറത്തൊടിയിൽ ആർത്തലച്ചു പെയ്യണം.

-

എനിക്കീ മണ്ണിൽ ഏകാന്തതയുടെ
ആത്മാവായി ജനിക്കണം..,

അന്ന് എന്റെ വശ്യതയെ ആസ്വദിക്കാൻ
ഇനിയുമൊരുപാട് ഗാബോ പിറക്കണം.
വീണ്ടുമൊരു ദുഃഖവെള്ളിയാഴ്ചയിൽ
ചലനം വെടിഞ്ഞു നീ ഉറങ്ങുമ്പോൾ
മൺപുറ്റിനിടയിലൂടെ
നിന്നിലേക്കൂർന്നിറങ്ങണം.

പ്രിയപ്പെട്ടവർക്കെല്ലാം കൂട്ടിരിക്കണം.
കൊരുത്തിട്ട പ്രണയത്തെയാ നിലാവിൽ
അവനറിയാത്ത ഭാഷയിൽ
പറഞ്ഞു തീർക്കണം.

എന്നെ പ്രണയിക്കുന്നവരുടെ
കവിതകൾക്ക് ബീജമാവണം,
ചിന്തകളുടെ ഗർഭപാത്രമാവണം.... !!!

-

ഇനിയൊരു ജന്മമില്ലെന്നുള്ള തിരിച്ചറിവിലാണ് ഓരോ ജീവിതവും പൂർണമാവുന്നത്..

-

കല്ലിൽ കൊത്തി വിസ്മയം
തീർക്കുമൊരു ശില്പിയായി
ജന്മം കൊള്ളണം...
കല്ലുപോൽ മരവിച്ച മർത്യൻ തൻ
മനസ്സിനെ കല്ലിനെ പുതുരൂപ്യനാക്കും
നന്മയുടെ ശില്പിയായി..
തെരുവിലെങ്ങോ വലിച്ചെറിഞ്ഞ
അനാഥമാ കല്ലുകളെ പെറുക്കിയെടുത്ത് അധപതിച്ചു
കൊണ്ടിരുക്കുമാ സമൂഹത്തിൽ
വേറിട്ടൊരു ജീവൻ തുടിക്കും
നന്മയുടെ ശിലകൾ കൊത്തിയെടുക്കണം..
ഇനി വരുമൊരു തലമുറയ്ക്ക് ഒരു
പുത്തൻ വെളിച്ചം വീശുമാ വിധം..

-

എനിക്കു ഞാനായിത്തന്നെ പിറക്കണം ബാല്യത്തിൽ മൊട്ടിട്ട കുഞ്ഞു കുസൃതികൾ വീണ്ടുമാവോളം ആസ്വദിക്കണം.പറ്റിയ പിഴവുകളത്രയും ഒരുകുറ്റബോധത്തിനു വഴിവെക്കാതീജന്മമില്ലായ്മ ചെയ്യണം. പാടിപ്പതിഞ്ഞ വരികൾപോലെൻ കാൽപാടീ ഭൂമിയിൽ എന്നെന്നേക്കുമായി പതിപ്പിക്കണം .എന്നെ ഞാനാക്കിയ എന്റെ മാതാപിതാക്കളെ മതിയാവോളം സ്നേഹിച്ചെന്റ കഴിഞ്ഞ ജന്മത്തിൻ കടം വീട്ടണം............

-

എനിക്കു മഴയായ് പെയ്യണം
നീറുന്ന മനസിനും വരണ്ടുണങ്ങിയ മണ്ണിനും കുളിരേകണം...
മാനം കാണാതുറങ്ങുന്ന വിത്തുകളെ
തൊട്ടുണർത്തണം
പല വഴികളിലായോഴുകണം
സാഗരത്തിൽ ലയിക്കണം
വീണ്ടും മേഘമാവണം
വീണ്ടും പെയ്യണം...

-

കവിതയായ് പിറക്കണം
മരണത്തെ തോൽപിച്ച്
ഹൃദയങ്ങളിൽ ജീവിക്കണം.

-

ഇനി ഒരു ജന്മമുണ്ടെങ്കിൽ...
എൻഅമ്മതൻ ചെരുപ്പായി ജനിക്കണം...
ഈ ജന്മത്തിലെ പാപങ്ങൾ മുഴുവൻ അടുത്ത ജന്മത്തിൽ അമ്മയെ ചുമന്നു തീർക്കണം...

(അമീനത്ത്_അമി)

-

വിടപറയും വേളയിൽ തുളുമ്പിയ
മിഴികോൺ കരതലങ്ങളാൽ
മറക്കാൻ പാടുപെട്ട് ഇടറിയ
സ്വരത്തിലവൻ പറഞ്ഞു
"അത്രക്കിഷ്ട്ടഡോ തന്നെ"
ഞാൻ തിരിഞ്ഞു നോക്കി.
ജാതി, മതം, സമൂഹം, ബന്ധങ്ങൾ
എല്ലാവരുമെന്നെ ഉറ്റുനോക്കി നിൽപ്പുണ്ട്..
ഞാനവർക്കൊപ്പം നടന്നു നീങ്ങി....
പിന്തിരിഞ്ഞുനോക്കാതെ...
തേങ്ങലുകൾ ഉള്ളിലൊതുക്കി...
പിടയുന്നയെൻ ഹൃദയം
അവനരികിൽ ഉപേക്ഷിച്ച്....
മരവിച്ച കാൽവെപ്പുകളുമായി...
അപ്പോഴും വെറുതെ ഒരു മോഹം
ഉള്ളിലലയടിച്ചുയരുന്നുണ്ടായിരുന്നു..
"ഇനിയൊരു ജന്മമുണ്ടെങ്കിൽ.. !!"

-