बाबोसा थारी गलियाँ मं बचपन स म्हारा..
मैं सुनाऊँ थानै बातङली थे भरो नी हुंकारा..!!

बाबोसा थारै महलां म बाईसा री ठाठां..
खिङकियाँ ग ओले ओले म्हारी मिठ्ठी सी बातां..!!

बाबोसा थारै आंगनिये मं तुलसी गा स बूंटा..
अठै री हवा सूं हर मौज रा पलङा लुट्या..!!

बाबोसा थारी आँख्या मं म्हारी स फिकरां..
ओजू मैं जानूँ भलां ही ना करिजो जिकरा..!!

बाबोसा थारी पगड़ी मं लाजां स म्हारी..
जद ताईं जीवण रेसी शान बढाँउली थारी..!!

बाबोसा थारी गलियाँ मं बचपन स म्हारा..
मैं सुनाऊँ थानै बातङली थे भरो नी हुंकारा..!!

-

बाबोसा..
मैं थाणे हिवड़ै री कोर सी
क्यूं म्हाने थै उण देस दीवी
जठै किण रे हिवड़ो ही कोनी..
बाबोसा..
मैं थाणे बागां री चिड़कली सी
क्यूं म्हाने उण बाग दीवी
जठै थाणे जैड़ो माळी ही कोनी..
बाबोसा..
मैं माँसा री लाड़ दुलारी सी
क्यूं म्हाने उण हाथ दीवी
जठै माँ जैड़ो काळजो ही कोनी..
बाबोसा..
मैं भायां रे हिवड़ै रो हार सी
क्यूं म्हाने उण ठौड़ दीवी
जठै म्हारो कोई मान ही कोनी..
बाबोसा..
मैं थाणे सगळा रे जीव री जड़ी सी
क्यूं म्हाने उण ने परणा दीवी
जिणनै म्हारो कोई मोल ही कोनी..
बाबोसा..

-