હ્રદય ખોલીને આખું, હું કાગળ પર મૂકું છું;
હા હું થોડી કવિતાઓ લખું છું...
ગૂંચવાયેલી લાગણીઓને ઉકેલવા મથું છું;
શબ્દો ગોઠવતા ગોઠવતા થોડી જીંદગી પણ ગોઠવું છું;
હા હું થોડી કવિતાઓ લખું છું...
ના કહી શકું જે કોઈને, તે મારી કલમને કહું છું;
અને પછી લખાતા એના લખાણોમાં ક્યાંક હું પણ રહું છું;
હા હું થોડી કવિતાઓ લખું છું...
કંઠે બાજેલો લાગણીઓનો ડુમો, ઓગાળવા ચહું છું;
અને રોજ હૂંફની શોધમાં, શબ્દોનું તાપણું કરું છું;
હા હું થોડી કવિતાઓ લખું છું...
કેટલાય છે સવાલો, જેના જવાબ શોધું છું;
આ શોધમાં ભટકીને થાકી, બસ હવે હું અટકું છું;
આમ ખાલી કરીને મન, હું થોડા પૃષ્ઠો ભરું છું ;
હા હું થોડી કવિતાઓ લખું છું...
-