आधी रात की बातें...।
Raat ke sannaaton mein kitni hulchal rahti hai.. jaise din bhar ki bhadaas kahin bachi rah gayi thi. Har aahat, har sarsaraahat.. kitna shor karti hai, jaise kisi pinjre se chhuti ho.
Raat ke andheron mein roshni chupchap dekhti hai sab kuch aur parchhaiyan unhe chidhati hui gum ho jaati hai.. kisi andhere mein.
Gaadion ki raftaar se raat bhi darti hai.. aur darti hai unki cheekhon se, unke bade ohde se... kyunki raat kisi ki akeli nahi hoti.. fir chahe licence bhi ho.
Sannata sochta hai kahan bikhar jaun jahan koi saath ne dikhe, Koi khalal na bane, lekin jhingur aur keet-patange bhi uska mazaak udaate hain. Wo rengta rahta hai chithdon mein, kabhi is gali se us gali... aur kutton ko aahat milte hi shuru ho jaate hain.. ek sur mein bhunkne. Khaamoshi gharon ki uchat jaati hai, lekin alsa kar, ek ghunt ki paani se fir pasar jaati hai.. jhoot ke saath.
Bahut mushqil hai ek raat sukoon ki.. kabhi koi laathi thokta chalta hai, kabhi sab dabe paanw chalte hain. Raat ki aagosh mein kitne bahaane, kitne afsaane khud hi beparda ho karte hain fareb.. aur badnaam hoti hai...Raat
-